In l’onore di u nostru casale
Dapoi 42 anni, e ghjurnate europee di u patrimoniu mettenu in luce una ricchezza senza paru di i nostri paesi è cità. Bastia è Aiacciu ci piglianu torna a so parte cuntinuendu di smaravigliacci.
St’annu, e realizazione techniche è artistiche di l’architettura seranu e stelle di a manifestazione creata da u ministeru di a cultura. Attraversu i so muri carichi di Storia, e so 14 chjese è i so quartieri anziani, a bella Bastia, ella, vi dà appuntu quant’è mai. In ogni locu di a cità, vi ci aspettanu i guidi cunferenzieri, per favvi scopre spassighjenduvila Bastia d’oghje o d’a Bella Epica, di ghjornu o di notte, i so edifizii religiosi di u 17esimu seculu, i so prestigiosi casamenti è stituzione…
Trà ducumenti d’archivii, futugraffie vechje è publicazione, U Palazzu di ghjustizia vi palisarà i so sicreti, è u Museu di Bastia a so nova mostra, « Napoléon IV, Le prince corse oublié (1856-1879) », accantu à quella di L’Arsenal, « Terriroire(s) », chì, in futugraffie, si ne và à scopre aria pè issi paisaghji è isse custruzzione corse. I ciuttadori di livellu 1, elli, puderanu ancu cuntemplà à Bastia sott’à l’acqua, percurrendu l’elpe marine à l’intrata di u portu. Infine, u prugrammu bastiacciu prevede recitali lirichi, percorsi butanichi, attelli è ghjochi di pista da fà in famiglia, senza scurdassi di a so animazione magiore : a rilleva di i guvernadori ghjinuvesi !
Dialugu architetturale
In Aiacciu, e ghjurnate di u patrimoniu s’uffreranu dinò à i cinini cum’è una stonda per ghjucà à l’archeulugucci o cercà à risolve enimme in u scopu di vede apresi e porte di l’Antiquarium Saint-Jean, capi affissu di st’edizione di u 2025. Trà u corsu Dominique Paoli è u carrughju Antoine Sollaca-ro, stu locu patrimuniale unicu hè statu inauguratu u 3 di lugliu da a Cità Imperiale. Valurizeghja u situ d’un battisteru paleucristianu ritrovu frammezu à i vistighi di a prima catedrale d’Aiacciu.
Cuncipitu da l’agruppamentu Orma Archittetura – CGZ Beaurmeco-Sinetic-Igenia, l’Antiquarium si cumpone di dui spazii : unu dedicatu à a spusizione, l’altru à a mediazione culturale. U publicu ritruverà custì, cù altri trisori, u sar-cofagu dettu « du Bon Pasteur », in marmaru di Carrara, stallatu prima in prefettura. Inquant’à u battisteru, porghje a so bellezza antica à i sguardi à l’agrottu d’una struttura in vetru, inturchjata è puntellata da una pru-tezzione realizata à parte da e terre di Monte Gozzi. Una manera chì l’architettura d’eri possa entre in dialugu cù quella d’oghje.
