Galleria noir et blanc : nantu à quelli muri, u sognu

Ci hè sogni chì piglianu u so tempu per stallassi. Quellu d’Anne-France Van Peteghem è di i vuluntarii di a galleria Noir et Blanc, purtata oghje da l’associu Festivale di u MercARTu, nasce in cima à un carrughjellu in core di Bastia.

« Era in u 2018, conta a direttrice. Mentre ch’è no occupavamu un spaziu chjucu, avemu scupertu stu locu magicu è, da tandu, ùn avemu più smessu di pensacci. » Trè anni dopu, u bramu torna rialità : nant’à a piazza di u Mercatu, a galleria si stende prima nant’à 300 m², nanzu d’impegnassi in una ristrutturazione dittata da u cuntestu generale. « In ogni locu, i bilanci “Cultura” si strìnghjenu è l’acquistu d’opere d’arte si face più esitente, ricunnosce Anne-France chì, da a Tunisia à a Grecia passendu per e Filippine, hà campatu parechje vite nanzu di sceglie questa. Malgradu a cunghjuntura, Bastia conta cullezziunisti fideli è visitadori curiosi.

È ciocca à dì chì campà in mezu à l’opere d’arte hè qualcosa d’assulutamente magnificu ! » In giru à a gallerista, l’ambiente hè baroccu è accugliente : tappetti sottu à i passi, salotti chjuchi, luminariu roccoccò… L’opere a si ragionanu cù u locu è invitanu u publicu à figurassi : è s’ellu fussi quì, in casa meia, stu quatru ?

Arte è vita

« Vulemu mette in lume a creazione cuntempuranea corsa, tutte e tecniche cumprese – pittura, incullatura, acquarellu, ceramica o scultura – accumpagnendu più di centu artisti di l’isula sana. A selezzione, assicurata da un cumitatu esigente, s’arremba à criterii di qualità, d’originalità, di scrittura plastica è d’emuzione. Dapoi st’annu, ogni artistu sceglie di modu liberu e dimensione di a superficia ch’ellu vole occupà. Quì ci prifirimu parlà di “tessitura artistica” piuttostu chè di “spusizione cullettiva” ».

Rinnuvellatu ogni mese, l’appicchera si cuncentra oramai à u pianterrenu, mentre chì u primu pianu accoglie u Café Bernard, in u quadru d’un partenariatu cù l’associu Festivale di u MercARTu, presidutu da Chantal Pantanacci è sempre in cerca di mecenii. Bella inserita in u tissutu culturale bastiacciu è aperta da u marti dopu meziornu à a dumenica matina inclusa, a galleria Noir et Blanc riceve aspessu l’elevi di u Cunservatoriu per cuncerti è apre i so muri à u Festivale di BD di Bastia cum’è à Arte Mare.

Vole dinù dà di più sviluppà à u Festival d’Art Actuel de Bastia, ch’ella stessa hà creatu. Intantu, RCI li didicheghja un’emissione misinca, Les divans de la galerie,animata da André Casabianca. Segnu chì u sognu cuntinueghja à scrivesi à e cimarre.