CACEL di Portivechju : a fiara di l’educazione artistica
In 42 anni, u CACEL di Portivechju, diventatu una istituzione, hà intricciatu ligami forti cù attori publichi pè sviluppà una offerta culturale unica, indissuciabile da a so vucazione suciale.
Da quandu ch’ellu hè natu, u CACEL (centre d’activités culturelles et de loisirs) hà tragulinatu da un locu à l’altru di a Cità di u Sale, nanzu di stallassi 2 avenue Maréchal Leclerc, in lucali messi à dispusizione da a cumuna. In lu 2020, cù l’affaccata di l’attuale squadra di direzzione, hà pigliatu un sbilanciu novu. « Hè diventatu ‘polu territoriale assuciativu di furmazione à a pratica artistica’, spiega Aurore Vacca, cantante, direttrice è anziana eleva di u CACEL, furmata in musiculugia è in gestione di strutture artistiche.
In partenariatu cù u Cunservatoriu di musica è di ballu di Corsica, cuntribuimu à un percorsu di furmazione iniziale diplumante ricunnisciutu à livellu naziunale. Sta labellizazione rigiunale face di a Cullettività di Corsica u nostru principale finanziadore. Ma u nostru associu, chì dipende da a lege di u 1901, si primureghja di a so indipendenza ! »
Un soffiu novu
U CACEL cuncepisce è si dà à animà dinù classe musicale in e scole primarie. 68 zitelli di 3 classe praticanu cusì a musica inseme un’ora à settimana in tempu di scola è un’altra ora fora di stu tempu. Tutti amparanu à sunà un strumentu o à cantà è piglianu parte à un spettaculu annuale cumunu.
« In cullaburazione cù i prufessori di e scole chì l’interessa u prughjettu, i nostri insignanti seguitanu listessi zitelli trè anni à fila, assicuranu cusì a cuntinuità pedagogica necessaria à a pratica d’un strumentu ». Ind’è ellu, l’associu prupone attelli per tutti di ballu (jazz, classicu, cuntempuraneu, street jazz, hip hop) è di musica (svegliu, solfegiu, strumenti è canti diversi in modu sulignu o cullittivu), cum’è d’arte visuale è di yoga.
Tessidore di leii
Ville », u CACEL, cù a so cuurdinatrice di vita suciale, si dà di manu à favurì l’inserzione è a cuesione suciale per mezu di a cultura è di tariffe adatte (l’attività di cusgitura è di cantu pulifonicu sò accessibile di rigalu).
Cù 400 aderenti, 18 impiigati è un bilanciu annuale di 400 000 euri, conta cum’è un attore maiò in u paisaghju sucìuculturale isulanu. In più di i so stazii di vacanze, vi dà appuntamentu u 13 di dicembre à a mediateca di Portivechju per una carta bianca lasciata à e so ballarine è u 17 per u so cuncertu di Natale. Dopu, u 7 di ferraghju di u 2026, festighjerà u carnavale à l’usu di Peter Pan. Un tema chì serà dinù quellu di u so spettaculu di fine d’annu.
