Cumpagnia Cygne Noir : l’imprevistu in scena
Struttura ch’ùn si pò classificà, Cygne Noir hà fattu di l’arte teatrale, sin’à a scola, un arnese di riflezzione, di dialugu è di scambiamentu. E so creazione mischjanu teatru, ballu, musica è cantu.
« À u principiu, a cumpagnia hè stata creata per ospità i spettaculi », arricorda Fanny Alfonsi, a so direttrice è cofundadora cù u so fratellu Jean-Baptiste. U parcorsu riccu è ati-picu di sti dui artisti corsi, cumedienti è ballerini, da parte ùn si pò mette : ella diplumata in scenze pulitiche è in dirittu, ellu furmatu da anziani attori di a Cumedia Francese. Tramindui anu cruciatu a strada di Raymond Acquavi-va. « Un scontru decisivu », conta l’au-trice di Cygne Noir, finanzatu solu da l’attori publichi è diventatu un cuupe-ratore impurtante di i cullegi è i licei di Corsica. Per l’adulescente, a cum-pagnia hà adattatu u cuncettu di u Teatru Forum.
« Aghju scrittu trè sce-nucce ispirate da fatti reali, campati in Corsica è ducumentati, nant’à u talluzzà per mezu di i retali suciali. E l’intalpetremu dapoi trè anni in i sta-bilimenti sculari è dopu, cù l’elevi, femu i ghjochi d’impruvisazione. À elli li piacenu assai ste stonde è per l’insi-gnanti, hè spessu una manera di piglià polzu di a so classa. » Cusì, a cumpagnia hà digià racoltu testimunianze inattese è emuziunante…
Da a litteratura sin’à l’opera
« Cù u teatru, pruvemu à familiarizà a ghjuventù cù certe nuzione ghjuridi-che, per falli capisce qualessi elli sò i so diritti, perseguiteghja Fanny, figliola d’avucatu. L’Università di Corsica s’hè accuppiata à a dimarchja in u quatru di u pruhjettu Scenze Participative. » Sperendu per altru di rimette i zitelli à a lettura, Cygne Noir hà cuncepitu u spettaculu, Le Presque Petit Prince de pas tout à fait Antoine de Saint-Exu-péry, digià prugrammatu in ghjurnata ignilocu in Corsica. « Sta pezza s’apre cù una manifestazione è un mottu : “Menu screni è più libri !” Una altra di e nostre creazione attualmente in giru si chjama U sognu di a Terra è parla d’eculugia. Si n’hè andata à u Festivale d’Avignon è puderia esse ghjucata frappocu per u festivale d’Edimbourg. »
In tantu, l’Opera di Parigi a sceltu Cygne Noir per travaglià cù u culle-ghju di Biguglia è a scola Toussaint Massoni intornu à l’Opera. Cusì i più ghjovani anu scupertu st’annu à Dante, U barbieru di Seviglia, A bella in u boscu addurmentata… « A nostra brama è di buscà sempre di più chjave peda-gogiche è di strutturà a cumpagnia. » Stu veranu, Cygne Noir derà ripresen-tazione di i so dui ultimi spettaculi in parechji paesi di Corsica. U sognu di a Terra hè prugrammatu dinù u 4 di ghjugnu in Bastia (à l’Appuntu, in piena aria) è u 18 di dicembre di u 2025 in Biguglia (Spaziu Carlu Rocchi).
ciecygnenoir.com
Instagram @ciecygnenoir
