Praticalingua :  campà u corsu

Da Bastia à tutta a Corsica : Praticalingua, una rete viva di trasmissione di a lingua

« Tuttu hà cuminciatu in Bastia cù Lisandru de Zerbi è una piccula squatra, conta Paul Turchi-Duriani, u direttore bastiacciu. Vuliamu prupone un spaziu d’accuglienza cunviviente per praticà a lingua for’ di scola qualsiasi e cumpetenze, cù piacè è senza paura di u ghjudicamentu. Oghje u situ di Bastia cuncoglie nunda chè ellu solu 400 aderenti è 30 furmadori diplumati è ricunnisciuti, tutti rimunerati, ciò chì cuntribuisce à fà ricunnosce a trasmissione di u corsu da attività prufessiunale. Cù una trentina d’attelli (ghitarra, teatru, pulifunia, scrittura, literatura, svegliu linguisticu per i ciucci, lingua d’ogni ghjornu…), u nostru mudellu hè arradicatu, à pocu pressu, in ogni locu di Corsica. È di Praticalingua ci si ne trova avà in Muriani, Corti, L’Isula, Siscu, Avretu-Portivechju, è da pocu in Nebbiu. Tutti sti siti sò labellizati da a CdC “Case di a lingua” è ognunu di quessi ci hà a so ufferta uriginale : storia corsa in Bastia, mandulina in Corti, mangà in piaghja… A squatra di Siscu intervene dinù in Ruglianu et quella di Bastia in Miomu. »

Cultura, arte è diffusione

Aldilà di e cunnutazione ideologiche è pulitiche, è di l’uppusizione trà bislinguisimu è immersione, vene avà chì Praticalingua torna soprattuttu un arnese magnificu per difende a lingua, intriccià ligami è sparte stonde ingiru à l’arte è a cultura. Corsofuni, cuntinentali è primi accedenti di tutte e mamme ponu ritruvassi quì. À Paul Turchi-Duriani li dispiace chì a giuventù ùn s’impatrunisca di più di l’attelli chì venenu piuttostu frequentati da i 40-50 anni è i ciucci.

« A casa, cù i so strumenti, stà aperta per tutti quelli chì ùn sò ancu à scrivesi à Praticalingua. Ma di cantà ùn basta micca. Ci vole à andà aldilà sin’à avè l’ardì di parlà ! Praticalingua hè u locu di tutti i pussibili cù Cuntinentali chì s’affaccanu dapoi 3 o 4 anni tutte e settimane è chì sò divintati corsofuni ! A nostra casa hè piena di belle storie. Una di i nostri aderenti, partuta à nove anni in cuntinente è chì ùn dicia più una parolla in corsu, mi cuntò un ghjornu ch’a voce è e spressionne di a so caccara li eranu rivenute à l’arechja per via di a nostr’attività à l’attellu di storia ! »

Urganizendu cuncerti, spassighjate, cunferenze, è tenendusi dinù caffè da locu suciale di scontru, Praticalingua si volta di più in più versu l’IA è e NTIC, cù anzituttu corsi in visiò. Ma mancu si scorda di l’altre lingue : inglese, talianu, spagnolu, catalanu, chinese… « Tuttu stu travagliu, ci porta oghje à strutturacci per diventà ufficialamente una federazione. »