Terzu locu di carrughju
Centru di vita suciale* è culturale pensatu in cuncirtazione cù l’abitanti di u Puntettu, in Bastia, l’Appuntu, gestitu da a Falep – Lega di l’insignamentu corsu, hè un locu sfarente cun tante è più risorze…
Stallatu dapoi appena più di un annu in u core di u Bastia vechju è vultatu versu u numericu, a cultura è l’attività assuciativa, L’Appuntu prupone di rigalu trè attelli settimanali d’iniziazione à a pittura pè i maiò, altri dui di ghitarra è di scrittura, ma dinù dui attelli « invechjà bè » è un attellu « clown » di spressione è di spannamentu persunale pè ligassi torna cù a so anima di zitellu, lasciassi andà è spannassi. « Quì cì hè sempre qualcosa da fà o da vede », testimunieghja un usarinu davanti a nova spusizione misinca è artistica di i lochi. « L’appuntu ùn hè propiu una galleria, precisa Alain Carrière, mediatore suciale. L’abitanti di u carrughju sò invitati à presentà e so prove creative cume sò invitati l’associ à apprudà e sale messe à dispusizione per elli. U centru hà ancu u so polu infurmaticu induve s’ampara l’adopru di l’urdinatore cù un cunsiglieru numericu, è induve pudemu aiutà i publichi in e so dimarchje amministrative persinu à a stampa di rigalu di i so ducumenti. »
Leghe è fà leghje
Cù i so 300 m2, l’Appuntu hà fattu una piazza bella à un spaziu chjamatu « Biblio facile à lire », chì campa à u ritimu d’attelli di mediazione pè persone in dificultà di lettura o in situazione d’illetterisimu. « Urganizemu stonde di lettura à alta voce cù un intervenente pè turnà à creà leie trà u libru è sti publichi, spiega Céline Bastelica, cuurdinatrice Falep di l’azzione educativa è culturale. Cume simu “Relais Lecture” di a CdC, dispunimu d’un fondu riccu di publicazione adattate. L’idea hè dinù di fà ch’elli s’incontrinu tutti i publichi, lettori è personne alluntanate da u libru. Ghjè per quessa ch’avemu messu in piazza un club di lettura. » A Falep cuurdineghja attempu u prugramu « Lire et Faire Lire », pè prumove a lettura-piacè cun quelli da 0 à 12 anni, è l’azzione « Jeunes en librairie », destinata à i culligianti è i liceani per sensibilizalli à l’ecunumia di u libru, à a diversità di a pruduzzione edituriale è à u travagliu di i librarii indipendenti. Avendu creatu « La Caravane des conteurs », ci appughjemu nant’à una rete di benevulenti furmati chì si spiazzanu à a dumanda in i stabilimenti sculari, e ciuccerie, e mediateche. « Avà, unu di i nostri primi ogettivi hè di fà ch’ellu affacchi quì, in u spaziu Biblio, u massimu di persone, sapendu chì quelle chì si trovanu in situazione d’illetterisimu stanu à sturzulà perchè chì, à elli, li vene male di palisà e soie e dificultà. Tocca à noi à fàlli vede e cose altrimente. » Frà pocu, a Falep spera di lancià un cuncettu di bibbiuteca viva chì i libri seranu persone di carne è d’osse !
*agraditu « EVS » (« Espace de vie sociale ») da a CAF.
